طبعا الموضوع بيبدأ بشعارات كاذبة جدا زى احنا بنشترى راجل ومايهمناش الفلوس بس الحقيقة ان معظم الاسر المصرية فى التفاوض بيهمها الفلوس على اساس انها هاتامن بيها مستقبل بناتها ...
فهنلاقى كل اسرة بتدور على عريس متريش او على الاقل مستريح وتقعد تفاصل معاه على اللى هايقدمه ناسيين او متناسين ان امان بنتهم مع الراجل الاصيل الراجل اللى عنده مبادئ واخلاق وطموح اللى يصون البنت فى الحب والكره اللى يكرم فى حالة الاستمرار ولا يهين فى حالة الانفصال عشان كده المحاكم مليانة قضايا ونزاعات اغلبها على الفلوس وده نتيجة التركيز على الجوانب المادية بغض النظر عن شعارات انها مش مهمة وادعاءات الاصل والاخلاق ..
ده غير كمان ان الطلبات المبالغ فيها بتخلى الجواز نفسه صعب وبتعمل ضغوط على الشباب ولو سالت اب اى عروسة هاتلاقيه مابدأش البداية المستريحة دى وكان على قد حاله لحد ماربنا كرمه بس هو ناسي برضه او بيتناسي ...
طبعا السبب التانى فى المبالغات المادية فى الطلبات هو المنظرة الفارغة والتباهى على الاهل والاقارب والاصحاب ان العريس جاب ايه وقدم ايه وعمل وسوى ايه وعمل فرح فين وللاسف بيتحول الموضوع لكابوس بعد الجواز فى حالة الانفصال ..
المهم ان الموضوع بييقلب تناقض ممل لما العيلة تروح تخطب لابنها وتلاقى طلبات تعجيزية وتستاء مع انهم هما هما اللى طلبوا نفس الطلبات من عريس بنتهم ....
فطبعا مفيش شاب بيكمل الا اللى اهله مستريحين والجواز بيتاخر وده كمان بيعمل مشاكل اجتماعية تانية زى زيادة نسبة العنوسة وانفلات اخلاق الشباب...
طبعا ده مش هايتصلح الا لما نعرف ان كلنا فى مركب واحدة وان بكرة هاكون فى نفس الموقف وان التساهل وشراء راجل بجد هو الاهم فارحمونا.....
