حوار بين مسلم عادى وسلفى!!!!!!

السلفى:السلام عليكم ورحمة الله
شخص عادى:وعليكم السلام
السلفى:إسم حضرتك إيه
العادى:محمد
السلفى:طيب ياسيدى,رد السلام كامل
العادى:وعليكم السلام ورحمة الله وبركاته
العادى:إيه المشكلة
السلفى:إفتكرتك مسيحى
العادى:لا مسلم
السلفى:الحمد لله,كنت عاوز أنصحك نصيحة لوجه الله
العادى:اتفضل
السلفى:يعنى تربية اللحية سنة واجبة عن الرسول,وهى فرض على كل مسلم إن شاء الله,وعشان تبقى باين إنك مسلم كده
العادى:أنا أعرف إنها سنة ولكن موضوع فرض ده ماعرفوش,وبعدين إزاي سنة تبقى فرض
السلفى:أى سنة مؤكدة عن الرسول فرض,والتمسك بها واجب وتركها حرام.
العادى:حرام!!!!!!
السلفى:إنت عارف لو إتمسكنا بكل سنن الرسول نسود العالم
العادى:بس الموضوع مضمون مش شكل,يعنى ممكن تلاقى واحد مربى دقنه وواحدة منقبة والموضوع كله شكل بس ومايعرفوش حاجة عن مقاصد الشريعة ودورهم فى إعمار الأرض
السلفى:ياأخى مفيش مضمون من غير شكل
إنت عارف كان مرة المسلمين فى معركة من المعارك مش قادرين ينتصروا على عدوهم وقعدوا طول الليل يفكروا إحنا ناسييين إيه من سنن الرسول وطلعوا ناسيين السواك, فاستعملوه وتانى يوم إنتصروا
العادى:معركة إيه دى ماعرفهاش وأنا قاري تاريخ كويس
السلفى:مش عارف معركة إيه بس حصلت
العادى:وإفرض يعنى هما لو ماكنوش أعدوا واستعدوا واستعملوا السواك كانوا كسبوا, والله يابلاش!!!!!
السلفى:أنا قصدى إن إلى بيلتزم بالدقن والشكل بيبقى جواه كويس
العادى:وانت دخلت جواه,دى بتاعة ربنا
السلفى:إحنا كلنا سلفيين ولازم نلتزم بكده وانت سلفى ولازم تلتزم
العادى:أنا مسلم مش سلفى ولو كل المسلمين كلهم سلفيين السلفية بقت هى الدين وبقت أعلى من الإسلام, ولو السلفيين جزء من المسلمين يبقى ده تشيع سخيف,وإحنا مسلمين بنقتضى بالرسول والصحابة وبنراعى عامل الزمان والمكان.
السلفى:انت لازم تسمع لشيوخ عشان تفهم
العادى:شيوخ زى مين!!!!!
السلفى:الشيخ ابو اسحاق الحوينى والشيخ محمد حسين يعقوب والشيخ محمد حسان وغيرهم
العادى:هما دول شيوخ,بأمارة إيه,هو كل احد دكتور ولا مهندس ولا سواق تاكسي قرا كتابين بقى شيخ!!!
السلفى:دول واخدين علمهم من كتب السابقين وكلام الشيوخ بتوعهم
العادى:تشيخ الصحيفة
السلفى:يعنى إيه؟
العادى:يعنى كل واحد قرا كتابين يفتى,والإمام الشافعى قال من تشيخ من الصحيفة أضاع الأحكام
السلفى:ماهى كل حاجة ظاهرة فى النصوص الموجودة,وكل حاجة تتعارض معاها حرام
العادى:أولا فى حاجة اسمها قطعى الدلالة وقطعى الثبوت فى القرآن والسنة وعشان حد يتفقه فى الدين لازم يكون عالم لغة ومتمكن منها الأول زي الشيخ الشعراوى
السلفى:الشعراوى, مابحبوش ليه سقطات كتير
العادى:زي إيه!!!!!
السلفى:زي موضوع الأغانى حللها
العادى:اولا ده بشر وبيغلط وبعدين فى موضوع الأغانى قال حلالها حلال وحرامها حرام وانت الحكم,يعنى لو أغانى مابثرش غرايز يبقى عادى
السلفى:والمزامير والموسيقى حلال والأغانى الموجودة كلها بتثير غرايز
العادى:طيب قالك انت الحكم وحكم عقلك
السلفى:مفيش عقل طالما فى نص
العادى:يعنى لو فى واحد قالك حديث عن الرسول ضد العقل وضعيف جدا والرسول أصلا ماقلوش ومش قطعى الثبوت يبقى إيه النظام
السلفى:اه
العادى:امال ربنا اداك العقل ليه والإسلام عظمته إنه دين فطرى يعتمد على العقل
السلفى:امال ربنا نزل القران ليه وايه لازمة السنة
العادى:طبعا ربنا انعم علينا بكتابه والقران ثابت محفوظ لكن نصوصه تم تفسيرها من قبل علماء وشرط التفسير إن يكون العالم متمكن من اللغة,والسنة المؤكدة الثابتة لا اجتهاد معاها ولكن لو فى حديث غير مؤكد وضعيف وضد العقل لا أقبله والأمور المستحدثة إلى مافيش حاجة عنها فى القران والسنة برده احكم عقلى وحسابى عند ربي
السلفى:امال إحنا بنعبد ربنا ليه
العادى :يعنى إيه
السلفى :يعنى إحنا كلنا عبيد لربنا والعبد مالوش إنه يفكر وربنا خلقنا بس عشان نعبده
العادى:بس إحنا مش عبيد عند ربنا
السلفى:إيه, انت بتقول إيه, استغفر الله
العادى:إحنا عباد الرحمن ولسنا عبيده
السلفى:ماهى هى
العادى:لا,ولو طلعت ايه فى القران ربنا وصف فيها البشر انهم عبيده يبقالك الكلام
السلفى:امال كلمة عبد دى ايه
العادى:كلمة عبد مفرد كلمة عباد وعبيد والفرق بينهم إن العبد مفرد عباد بيعبد معبوده عن حب وحق لإنه الخالق ويملك روحه وجسده وانعم عليه بنعمته والعبودية هنا عبودية حرية وإقتناع وخشوع,أما العبد مفرد عبيد فهى عبودية القهر والظلم وعبودية من لا يملك وعبودية الكره والإكراه
الأول:يصمت
العادى:شفت فارق اللغة
السلفى:الكلام معاك ممكن يغلط الواحد, سلام
العادى:وعليكم السلام ورحمة الله وبركاته